Well for me ooo i support the bringing back of our girls , but before them come i believe say make we as nigerians channel our effort to protecting our girls wen dey house with us , because beside boko haram wen dey kidnap them , we still get rapist , ritualists and pedophiles for our communities wen their work na to turn our small girls to mama before dem even finish primary school .
So out of the small brain wen dey my head i wan outline some basic steps wen we fit take to protect our girls .
1) Dont allow your female children walk alone : if you send your small girl message (like go buy maggi or go take money from auntie rita come) no allow her waka go on her own send person follow am , this way b4 any jaguda do anything one must escape .strength in numbers .
2) Caution your kids about talking to strangers : warn your children make dem no talk to person wen dem no know , weda the person talk say dem know dem mama ooo , or dem be their papa friends ooo , tell dem make dem talk to only people wen dem know from house .
3) Caution your kids about taking gifts from strangers : again tell your children make them no take any gift from any person wen dem no know , because all these rapist , ritualist and pedophiles sabi bribe children with sweet kpof-kpof ,after dem chop am na God know wetin go happen .
4) Know your child's Friends and their parents : try make you know all your children friends and their mama and papa too , so that if dem say dem dey go any of them friend place you know where them dey and you know where to go carry them from . na day time dem take dey search for black goat .
this one's na the few steps wen i know for if you know any add join and help protect our girls #protectourgirls .
No comments:
Post a Comment